ភ្នំពេញ៖ ប្រជាពលរដ្ឋនៅទូទាំងប្រទេសប្រមាណ ១១ម៉ឺននាក់ បានទៅធ្វើការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២២ សម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ខាងមុខនេះ។

សេចក្ដីប្រកាសព័ត៌មាន ចុះថ្ងៃទី២៨ ខែតុលា ឆ្នាំ២០២២ គណៈកម្មាធិការជាតិរៀបចំការបោះឆ្នោត (គជប) ឱ្យដឹងថា គិតត្រឹមថ្ងៃទី៨ នៃដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២២ ប្រជាពលរដ្ឋនៅទូទាំងប្រទេស ចំនួន ១១៤ ៩៧១នាក់ បានចេញទៅពិនិត្យបញ្ជីឈ្មោះ និងចុះឈ្មោះបោះឆ្នោត។

សេចក្ដីប្រកាសព័ត៌មានដដែល ឱ្យដឹងថា សម្រាប់ថ្ងៃទី២៧ ខែតុលា ឆ្នាំ២០២២ ប្រជាពលរដ្ឋចុះឈ្មោះបោះឆ្នោតថ្មីមានចំនួន ៩ ៥៣៧នាក់ អ្នកត្រូវបានលុបឈ្មោះចេញពីបោះឆ្នោត ចំនួន ៩ ០០៤នាក់ អ្នកដែលបានកែតម្រូវទិន្នន័យ ចំនួន ៨២៥ នាក់ និងអ្នកដែលបានផ្ទេរទីលំនៅចូលក្នុងឃុំ សង្កាត់ថ្មី មានចំនួន ៣ ២៩២នាក់។

ក្នុងនោះ គណៈកម្មាធិការជាតិរៀបចំការបោះឆ្នោត ឱ្យដឹងបន្ថែមថា សរុបរយៈពេល ៨ថ្ងៃ នៃដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២២ ប្រជាពលរដ្ឋសរុបចំនួន ១១៤ ៩៧១នាក់ បានចុះឈ្មោះបោះឆ្នោតថ្មី អ្នកដែលនឹងត្រូវលុបឈ្មោះចេញ មានចំនួន ៦៧ ៤០៦នាក់ អ្នកដែលកែតម្រូវទិន្នន័យ ចំនួន ៧ ១៤៤នាក់ និងអ្នកដែលផ្ទេរទីលំនៅចូលក្នុងឃុំ សង្កាត់ថ្មី មានចំនួន ៣៦ ២៩១នាក់។

អ្នកនាំពាក្យគ.ជ.ប លោក ហង្ស ពុទ្ធា កាលពីថ្ងៃទី២១ ខែតុលា ឆ្នាំ២០២២ បានថ្លែងបញ្ជាក់ប្រាប់អ្នកសារព័ត៌មាន EAC ថា ពលរដ្ឋដែលមានឈ្មោះក្នុងបញ្ជីបោះឆ្នោតឆ្នាំ២០២២ តែដល់ពេលជិតបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ អត្តសញ្ញាណប័ណ្ណហួសសុពលភាព គឺមិនមានសិទ្ធិបោះឆ្នោតឡើយ។ មានសិទ្ធិបោះឆ្នោត ទាល់តែពលរដ្ឋទៅធ្វើអត្តសញ្ញាណប័ណ្ណថ្មី។ ប៉ុន្តែប្រសិនជាមិនទាន់ទទួលបានអត្តសញ្ញាណប័ណ្ណទាន់ពេលវេលាទេ មុនមួយខែបោះឆ្នោត ពលរដ្ឋអាចទៅស្នើសុំឯកសារបញ្ជាក់អត្តសញ្ញាណបម្រើឱ្យការបោះឆ្នោតឆ្នាំ២០២៣។

បើតាមអ្នកនាំពាក្យ គ.ជ.ប ដើម្បីទទួលបានឯកសារបញ្ជាក់អត្តសញ្ញាណបម្រើឱ្យការបោះឆ្នោតឆ្នាំ២០២៣ ពលរដ្ឋត្រូវទៅជួបគណៈកម្មាធិការឃុំសង្កាត់រៀបចំការបោះឆ្នោតដើម្បីស្នើសុំការបោះពុម្ពចេញពីក្នុងបញ្ចីបោះឆ្នោតដែលជាឯកសារ គ.ជ.ប រៀបចំទុករួចជាស្រេច ដើម្បីយកឯកសារនោះទៅបញ្ជាក់នៅមេឃុំ ចៅសង្កាត់ គឺអាចនឹងប្រើប្រាស់សម្រាប់បោះឆ្នោតបានហើយ៕